Faoi lán seoil: Cúig scannán úra Gaeilge ag Fleadh na Gaillimhe

Is scannán é Tarrac faoi chomórtais rámhaíochta atá suite i nGaeltacht Chiarraí

June 29 2022 02:03 PM

Tar éis bhua idirnáisiúnta An Cailín Ciúin, tá sé fógartha ag TG4 go mbeidh cúig scannán nua ag fáil a gcéad léirithe dhomhanda ag Fleadh Scannán na Gaillimhe.

Tá scannán a bhaineann leis na comórtais rámhaíochta idir pobail Ghaeltachta faoin gcósta, Tarrac, i measc na scannán sin a bheidh le feiceáil i bpictiúrlann an Pháláis i gCathair na dTreabh.

Scannán é Tarrac, ar nós An Cailín Ciúin, atá mar thoradh ar an gciste léirithe, Cine 4, a bhunaigh TG4 i gcomhpháirtíocht le Fís Éireann.

Scannán eile ón gciste is ea Róise agus Frank, ón gcomhlacht céanna a thug Arracht ar an saol. Tá trí scannán faisnéise ar an liosta – An Buachaill Geal Gáireach, scannán mar gheall ar amhrán faoi Mhícheál Ó Coileán, Aisling Trí Néallaibh faoin údar Doireann Ní Ghríofa, agus Cathair na Mílte Grian, a fhiosraíonn éifeachtaí an chogaidh le scrúdú ar Hiroshima, an chathair inar phléasc an chéad bhuama adamhach in 1945.

Tá clár iomlán na féile le fáil ag www.galwayfilmfleadh.com.