Dáithí Ó Sé: An seó is ansa liom... má tá cead agam fanacht suas mall go leor le hamharc air!

Ryan Rubridy sa Toy Show

An Late, Late Toy Show

Ryan Rubridy sa Toy Show

Dáithí Ó Sé

November 24 2021 02:00 AM

Tá an Late Late Toy Show ar siúl ar an Aoine. Is breá liom an ócáid seo – ní clár teilifíse amháin atá ann. An t-aon fhadhb atá agam leis agus cuirfidh mé díom é seo go luath ná nach maith liom é a bheith ar siúl i mí na Samhna!

Tá a fhios agam go n-oibríonn mé don stáisiún seo agus is cara maith liom é Tubs, fós b’fhearr liom an clár ‘Nollag’ seo i mí na Nollag! Sin é mo chuid ráite fé sin.

Is cuimhin le daoine atá ar comhaois liomsa Gaybo á chur i láthair agus chuala tamall fada ó shin ná raibh suim ar bith aige seó mar seo a dhéanamh ag an dtús agus ní fhaca sé an tairbhe a bhí ann go dtí go ndúirt comhghleacaí dár ainm Maura gur cheart é a dhéanamh – agus féach anois, ’sé seo an clár leis an lucht féachana a bhíonn ann gach bliain.

Ag féachaint siar, bhí ‘gig’ deas ag Gay i gcomparáid le Ryan an lae inniu. Bíonn i bhfad níos mó leanaí agus bréagáin ann na laethanta seo – ní bheidh i mbliana toisc Covid, ach bíonn de ghnáth.

An uair úd nuair a tháinig cluiche nó bréagán éigin ar an seó, sin an rud a bhí uainn ar fad don Nollaig. Ní bhíodh aon litir scríte go Saintí go dtí go mbíodh an Toy Show críochnaithe.

Is cuimhin liom nuair a chonaic an cluiche Mouse Trip ar an seó, ar an bpointe bhí sé uaim ó Saintí. Fuaireas rothar ar chúis éigin an bhliain sin – tuigim anois canathaobh go bhfuaireas. Bhí a aigne déanta suas ag Saintí roimhe sin! Seo, dála an scéil, an t-aon oíche sa bhliain go raibh cead againn fanacht inár suí tar éis a naoi agus ba rud mór dúinn é seo chomh maith.

Ní dóigh liom gur éirigh liom an chuid dheireanach den seó a fheiscint riamh.

Bhíos lán le ceol don gcuid is mó agus ansan bhíodh ar mo mháthair nó m’athair mé a thabhairt síos go dtí’n leaba. Bhuaigh an codladh i gcónaí.

Tarlaíonn an rud céanna na laethanta seo, ach dúisím ar an dtolg ag a dó ar maidin!

Is oíche mhór cóisirí an oíche seo anois.

Tá sé go hiontach mar tugann sé an chlann ar fad le chéile agus bíonn rudaí deasa le n-ithe agus, ag dul ar ais go dtí cad a dúirt ag an dtús, is ócáid atá ann.

Is cuimhin liom roinnt blianta ó shin bhí PJs an Late Late á gcaitheamh ag daoine timpeall na tíre.

Tá seó mar seo déanta dos na meáin shóisialta agus is mó a bhí ag féachaint ar an dá mhodh seo ag an am céanna. Is leor ceann amháin domsa.

Bíonn slite éagsúla ann gach bliain tús a chur leis an Nollaig agus seo ceann acu – agus an tslí go bhfuil rudaí ag imeacht na laethanta seo le figiúirí Covid agus mar sin de, beidh cúis áthais againn agus sinn ag féachaint i dtreo na Nollag agus a fhios againn go bhfuil níos mó sa saol seo seachas an diabhal víris sin.

B’fhéidir go rabhas mícheart, b’fhéidir gur cheart an Toy Show a bheith ar siúl mí ó shin!